Ərkivanda 200 illik sirli əmanət və cehizlə başlayan böyük sərvət – KƏNDİNƏ QAYIT - VİDEO
Baku TV-nin Xəbərlər Departamentinin müəllif və yaradıcı bölməsinin təqdimatı ilə müəllif-aparıcı Kəmalə Bədəlovanın hazırladığı “Kəndinə qayıt” verilişinin növbəti buraxılışı efirə gedib.
Rakus.az xəbər verir ki, yeni buraxılışda Masallı rayonunun Ərkivan qəsəbəsinə səfər edilib.
Qeyd edilir ki, Ərkivanda 18 mindən çox insan yaşayır. Masallı şəhərindən cəmi 2-3 kilometr məsafədə yerləşən qəsəbə qədim tarixi, zəngin adət-ənənələri və sənətkarlığı ilə seçilir. Ərkivanda nəsildən-nəslə ötürülən sənətlərdən biri sandıqçılıqdır. Qəsəbə sakini Seyfəddin Əzizov ata-babalarından miras qalan bu sənəti davam etdirir. O, həm ənənəvi, həm də müasir üslubda sandıqlar hazırlayır. Ustanın sözlərinə görə, bu sənət səbir və zəhmət tələb etsə də, hələ də sifarişlər alır və dolanışığını bu işdən təmin edir.
Verilişdə vurğulanır ki, qəsəbənin mədəni irsinin mühüm hissəsini Göllü məscidi təşkil edir. XIX əsrdə xalqın iştirakı ilə inşa edilən məscid üç məhəllənin sakinlərinə xidmət edib. Yerli sakinlər bu gün də həmin məkanı dini və mənəvi dəyərlərin qorunduğu yerlərdən biri hesab edirlər. Ərkivanın tarixi ilə bağlı diqqətçəkən məkanlardan biri Şeyx Səfi ocağıdır. Yerli rəvayətlərə və tarixi məlumatlara görə, Şeyx Səfiəddin burada yaşayıb. XVI əsrdə Şah İsmayılın da bu məkanı ziyarət etdiyi bildirilir. Qəsəbənin sakinlərindən Həmid Məmmədovun evində isə XVIII əsrin sonlarına aid olduğu ehtimal edilən “Tarixi-Nadir” kitabı qorunub saxlanılır. Təxminən 147 səhifədən ibarət olan əsər uzun illərdir ailənin mülkiyyətindədir. Kitabın mürəkkəb fars dilində yazılması onun oxunmasını və tərcüməsini çətinləşdirir.
Veriliş oktyabrın 18-də Baku TV-nin efirində və YouTube kanalında yayımlanıb.
Ətraflı videoada tanış ola bilərsiniz:
