“Azərbaycan Ermənistan ərazilərini ələ keçirmək məqsədi güdmür”
Bu gün Baku Tv-də Qərbi Azərbaycan Xronikası layihəsi çərçivəsində rus dilində növbəti buraxılış efirə gedib.
Rakus.az xəbər verir ki, aparıcı Ellada Sarvanın müsahibi politoloq İlqar Vəlizadə olub.
O, dünyada baş verən proseslərdən, Cənubi Qafqazda təhlükəsizlik məsələsindən danışıb, indiki siyasi proseslərdə rəsmi Bakının siyasətinin doğru olduğunu bildirib.
Politoloq Qərb və Rusiya arasında geosiyasi mübarizə getdiyini, bu mübarizə burulğanına düşən Ermənistan ətrafında çəmbər hər keçən gün daha da daraldığını, indiki Ermənistan ərazisinin tarixi Azərbaycan torpaqları hesabına genişləndiyini deyib: “Ermənistan böyük qeyri-sabitlik qövsün bir hissəsidir. Azərbaycan Ermənistan ərazilərini ələ keçirmək məqsədi güdmür. Erməni cəmiyyəti 30 ildir manipulyasiya edilib. Bütün XX əsr boyu Azərbaycan torpaqları müxtəlif bəhanələrlə Ermənistana verilib. 1925–1929-cu illərdə Azərbaycan KP MK-nin sədri vəzifəsində çalışan Levon Mirzoyanın dövründə Azərbaycan torpaqları qeyri-qanuni yollarla Ermənistana verilib. Ona görə də Qazağın 4 kəndinin Azərbaycana qaytarılması ədalətin bərpasıdır”.
Onun sözlərinə görə, Moskvadan uzaqlaşmağa cəhd edən Nikol Paşinyan Qərb qüvvələrini bölgəyə gətirməklə prosesləri gərginləşdirir: “Ermənilər bir xarici oyunçunu digəri ilə əvəz edirlər. Avropa İttifaqının mülki missiyasının Ermənistanda nə iş görməsi müəmmalıdır. Bundan əlavə, Gürcüstanda, Ermənistanda gedən son proseslər, etiraz aksiyaları Cənubi Qafqaz bölgəsində yeni gərginliyin yaranması üçün əsas ola bilər”.
İ.Verdiyev Qarabağ zəfərindən sonra Qərbi azərbaycanlıların doğma yurda qayıdışı məsələsi gündəmə gəldiyini vurğulayıb: “Əlbəttə, qayıdış prosesi olmalıdır və bu məsələ zaman alacaq. Ermənistanda azərbaycanlı əhalinin boş evləri öz sahiblərini gözləyir”.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Müsahibə mayın 14-də saat 18:30-da Baku Tv-nin efirində və Youtube kanalında rus dilində yayımlanıb.
