Gözüyaşlı atanın ürəkdağlayan hekayəsi – “Arzunun vaxtı” - VİDEO
Baku TV-də Müəllif və Yaradıcı Departamentinin təqdimatı ilə müəllif-aparıcı Arzu Səfərovanın hazırladığı “Arzunun vaxtı” verilişinin növbəti buraxılışı yayımlanıb.
Rakus.az xəbər verir ki, budəfəki verilişdə bir vaxtlar media sahəsində çalışan, hazırda Mənzil Kommunal Təsərrüfatı Birliyində süpürgəçi kimi fəaliyyət göstərən Tural Rəhimov həyatında baş verən çətinliklərdən, ailəsinin maddi durumundan və övladlarının taleyindən danışıb.
Onun sözlərinə görə, uşaqlıq illəri asan keçməyib. Altı yaşında anasını, 13 yaşında isə atasını itirən Tural internat məktəbində oxuyub. Onun həyatındakı əsas dönüş nöqtələrindən biri isə uzun illərdən sonra oğul övladının dünyaya gəlməsi olub. Tural bildirib ki, həyat yoldaşı ilə 10 il övlad həsrəti çəkdikdən sonra Əlican dünyaya gəlib. Lakin sonradan onda serebral iflic xəstəliyi aşkarlanıb.
Ata deyir ki, övladının müalicəsini davam etdirmək üçün ailənin imkanları tükənib. Onlar evlərini və bir sıra əşyalarını satıb, kredit götürüblər. Tural məhz oğluna daha çox vaxt ayıra bilmək üçün media sahəsindəki fəaliyyətindən uzaqlaşdığını və hazırkı işinə başladığını bildirib: “Əvvəl hər şeyim var idi, övladım yox idi. İndi övladım var, demək olar ki, dünyalarım var. Sadəcə həyatımız çox çətindir”.
Turalın birinci nikahından da qız övladı var. O, qızı ilə münasibətlərinin hazırda yaxşı olmadığını və bunun onun üçün ən ağır məsələlərdən biri olduğunu deyib.
Atanın sözlərinə görə, son söhbətlərindən birində qızı ona “Sənin kimi atanın olmağındansa, olmamağı yaxşıdır” deyib.
Tural isə qızından imtina etmədiyini, onu görmək və münasibətlərini bərpa etmək istədiyini söyləyib.
Veriliş iyulun 25-də Baku TV-nin efirində və YouTube kanalında yayımlanıb.
Ətraflı videoada tanış ola bilərsiniz:
