“Azərkosmos” “Tier 4” uyğunluq sertifikatı aldı - FOTO
“Azərkosmos”un Bakıda fəaliyyət göstərən teleportu “Tier 4” uyğunluq sertifikatını əldə edib.
Rakus.az xəbər verir ki,“Azərkosmos”un məlumatına əsasən, teleport “Dünya Teleport Assosiasiyası”nın “Sertifikatlaşdırma proqramı” üzrə bütün mərhələləri uğurla tamamlayıb.
Məlumatda bildirilib ki, “Azərkosmos”un Beynəlxalq Teleport Assosiasiyası tərəfindən sertifikata layiq görülməsi böyük uğurdur:
“Tier 4” sertifikatı teleport xidmətlərimizin yüksək keyfiyyət və texnoloji baxımdan müasir tələblərə tam cavab verdiyini göstərir. Bu sertifikat bizim insan kapitalının inkişafına, yeni texnologiyaya və müasir infrastruktura xüsusi önəm verdiyimizi bir daha təsdiq edir” – deyə, “Azərkosmos”un Baş kommersiya direktoru Mark Qusriye qeyd edib.
“Tier 4” sertifikatı teleport operatorunun müştərilərə göstərdiyi xidmətin keyfiyyətinə dair zəmanətdir. Sertifikat, həmçinin, operatorlar üçün infrastruktur, avadanlıq və prosedurların beynəlxalq təşkilat tərəfindən audit olunması baxımından da dəyərli imkandır”, – deyə Dünya Teleport Assosiasiyasının icraçı direktoru Robert Bell bildirib.
“Tier 4” sertifikatına malik olan şirkətlər təqdim etdiyi teleport xidmətləri, texniki infrastruktur və iş prosesinin etibarlılığına və təhlükəsizliyinə 99,9 faiz təminat verir.
“Azərkosmos”a məxsus teleportun resursları “Azerspace-1”, “Azerspace-2” və “Azersky” peykləri ilə yanaşı, digər peyk operatorlarının peyklərindən və fiber optik şəbəkə üzərindən gələn siqnalları qəbul etməyə imkan verir.
