Tələbə adını qazanan Ardanış kökənli gənclərlə görüş keçirilib - FOTO - VİDEO

Oktyabrın 14-də “Meredian” Şadlıq Sarayında Ardanış Kənd İcmasının təşkilatçılığı ilə 2026-2027-ci tədris ili üzrə ali məktəblərə qəbul imtahanlarında yuxarı bal toplayaraq yüksək nəticə göstərmiş və tələbə adını qazanmış əslən Ardanışdan olan gənclərlə görüş keçirilib.

Rakus.az xəbər verir ki, tədbirdə Qərbi Azərbaycan İcmasının sədri, Milli Məclisin deputatı, professor Əziz Ələkbərli, Çəmbərək Rayon İcmasının sədri, professor Əvəz Ələkbərov, Cil, Şorca kənd icma sədrləri , Ardanış Kənd İcmasının İdarə Heyətinin üzvləri və digər qonaqlar iştirak ediblər.

Tədbir açıq elan olunub, əvvəlcə Vətən yolunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Azərbaycanın dövlət himni səsləndirilib.

Göyçə mahalının qədim kəndlərindən olan Ardanış haqqında video-süjet nümayiş olunub.

Ardanış Kənd İcmasının sədri, professor Məhəmməd Kərimov çıxış edərək iştirakçıları salamlayıb, keçirilən tədbirin artıq ənənə xarakteri aldığını söyləyib: “Göyçə mahalının Çəmbərək rayonunun Ardanış kəndinin təhsil sahəsində uğurları ilbəil artır. Bu il tələbə adını qazanan gənclərin sayı 32 nəfərdir və onlar bu ənənəyə sadiq qalaraq xarici ölkə və yerli ali məktəblərə qəbul olublar. Tövsiyəm odur ki, beynəlxalq aləmə inteqrasiya olmaq üçün tələbələrimiz səylə çalışsınlar. Əminik ki, onlar bütün ümidləri doğruldacaq, tarixi keçmişlərini, soy köklərini unutmayacaqlar. İnşallah, belə günlərimizi doğma yurdumuzda da keçirmək hamımızın nəsibi olacaq”.

Qərbi Azərbaycan İcmasının sədri Əziz Ələkbərli, Çəmbərək Rayon İcmasının sədri Əvəz Ələkbərov, politoloq Zaur Məmmədov və digər şəxslər göstərdikləri yüksək nəticələr münasibətilə tələbə adını qazanan gənclərimizi və onların valideynlərini təbrik edib, qarşıdakı təhsil illərində, həyat yollarında uğurlar diləyiblər. Onlar icmanın səmərəli fəaliyyətini təqdir edərək deyib lər ki, Qərbi Azərbaycan İcması, eləcə onun rayon və kənd icmaları yaxşı formalaşıb: “Yeni nəslin savadlı böyüməsi, tələbələrin yaxşı təhsil alması, onların öz soy köklərini unutmaması üçün belə görüşlərin əhəmiyyəti böyükdür. Əminik ki, gənclərimizin öz bilik, bacarıqları ilə Ardanış adını hər yerdə uca tutacaq,  kəndin təhsil ənənəsini yaşadacaq, yaxşı təhsil alaraq ölkəmizin, elimizin-obamızın ictimai, siyasi, mədəni həyatında fəal iştirak edəcək, müxtəlif sahələr üzrə Azərbaycanı savadlı kadr kimi təmsil edəcəklər”.

Çıxışlardan sonra tələbə adını qazanmış şəxslərin adları elan edilib, tələbələrə mükafat və xatirə hədiyyələri təqdim olunub.

Görüşdə Azərbaycan Diplomatik Akademiyasının (ADA) 3-cü kurs tələbəsi Aişə Kərimli  tələbə andını oxuyub və gənclər daha yaxşı oxuyacaqlarına, ölkəmizin, elin, obanın adını daim uca tutacaqlarına and içiblər.

Bu il yüksək nəticə göstərərək Azərbaycan Tibb Universitetinin Müalicə işi fakultəsinə qəbul olmuş İsmayıl Hüseynov tədbirin təşkilatçılarına təşəkkür edib, onlara bəslənən bütün ümidləri doğruldacaqlarına, cəmiyyətdə ləyaqətli yerlər tutmaq üçün daha yaxşı təhsil alacaqlarını, yaxşı karyera qurmaq üçün çalışacaqlarını söyləyib.