ABŞ-da əhalinin 70-90 faizi peyvənd olunmalıdır
ABŞ-ın baş infeksionisti Entoni Fauçi Birləşmiş Ştatlarda kollektiv immunitetə nail olmaq üçün əhalinin 70 faizdən 90 faizədək vaksinasiyadan keçməli olduğunu hesab edir.
Rakus.az xəbər verir ki, infeksionist əvvəlki fikrini dəyişdiyini də vurğulayıb: o, əvvəlcə əhalinin 60-70 faizinin vaksinasiya olunacağı təqdirdə kollektiv immunitet yaranacağını düşünürdü.
Entoni Fauçi özü artıq “Moderna” kompaniyasının hazırladığı koronavirus əleyhinə vaksinin ilk dozasını alıb.
ABŞ-ın xəstəliklərə və onların profilaktikasına nəzarət üzrə mərkəzlərinin məlumatlarına əsasən, dekabrın 14-dən bu yana bir milyondan çox amerikalıya vaksinin ilk dozası vurulub.
Hələlik vaksinasiya sonuncu yoluxma dalğasına az təsir edib. Pandemiyanın statistikasını aparan Worldometer saytının məlumatına görə, ABŞ-da ötən sutka ərzində koronavirusa yoluxanların sayı 193 min nəfər artaraq 19 milyon 111 minə, ölənlərin sayı isə 2 min 835 nəfər artaraq 337 min 66 nəfərə çatıb. Birləşmiş Ştatlar həm COVID-19 infeksiyasına yoluxma, həm də ölüm hallarının sayına görə dünyada ilk yerdə qərarlaşıb.
Dünya üzrə yoluxanların 23 faizi və ölənlərin 19 faizi ABŞ-ın payına düşür.
