“Aşıq gözəlləmələri” şeir antologiyası çap olundu
Rakus.az xəbər verir ki, antologiya Aşıqlar Birliyinin sədri, əməkdar elm xadimi, professor Məhərrəm Qasımlı və professor Mahmud Allahmanlı tərəfindən hazırlanıb. Topluda ozan-aşıq poeziyasının mühüm qolunu təşkil edən gözəlləmələr geniş oxucu auditoriyasına təqdim olunur. Dədə Qorquddan üzü bəri gələn ustad sənətkarlarımızın yaradıcılığındakı çeşidli gözəlləmə örnəkləri toplanaraq bir araya gətirilib. Bu nümunələr gözəlləmə havaları üstündə oxunan ulularımızın gözəllik təsəvvürlərini, əxlaq və mənəviyyat zənginliyini, saz-söz sinəsində daşınıb gələn bədii-estetik dəyərləri aydınlaşdırmaq baxımından mükəmməl poetik sərvətdir.
Kitabda ustad aşıqların yaratdığı gözəlləmələrlə yanaşı, dastanlardan, el şairlərinin yaradıcılığından seçilmiş poetik örnəklərinə də yer verilib. Üç bölümdən ibarət antoloji nəşrin “Ozan-aşıq gözəlləmələri”, “Dastan gözəlləmələri” və “El şairlərinin gözəlləmələri” şəklində düzümlənməsində əsas məqsəd tarixi mənzərənin daha aydın görünməsidir.
Antalogiya geniş oxucu kütləsi ilə bərabər, aşıq ifaçılığı ilə məşğul olan sənət adamları üçün nəzərdə tutulub.
