Afrika İttifaqı Liviyaya dair “yol xəritəsi” hazırladı
Konqonun paytaxtı Brazzavildə keçirilən Afrika İttifaqı Yüksək Səviyyəli Komitəsinin 8-ci sammitində Liviyada münaqişənin həllinə dair “yol xəritəsi” müzakirə edilib.
Rakus.az xəbər verir ki, Afrika İttifaqının rəsmi saytına istinadla xəbər verir ki, sammitdə münaqişənin müzakirə olunan həll variantları bu yaxınlarda Berlində keçirilmiş iclasın yekunlarını ehtiva edir və bir neçə gün sonra Əddis-Əbəbədə təşkil ediləcək Afrika ölkələri dövlət və hökumət başçılarının 33-cü sessiyasında davam etdiriləcək.
Liviyada böhranın həlli ilə bağlı Sahil və Böyük Səhra ölkələri nümayəndələrinin təklifləri BMT Təhlükəsizlik Şurasına da təqdim ediləcək. Konqo Prezidenti Denis Sassu Nquesso bu məqsədlə Afrika İttifaqı dövlət başçıları tərəfindən xüsusi bəyannamə qəbul ediləcəyini də diqqətə çatdırıb. Münaqişənin həlli variantları arasında atəşkəs rejiminin uzadılması, Liviyada azad və şəffaf seçkilərin keçirilməsi məsələləri var. “Yol xəritəsi”ndə tərəflərin təmsil olunacağı müvəqqəti komitə yaradılması da nəzərdə tutulur.
Afrika İttifaqı bütün ölkələri Liviyada münaqişənin tezliklə həlli istiqamətində səyləri gücləndirməyə, konstruktiv fəaliyyət göstərməyə çağırıb.
