Ağdamda birgə hazırlıq kursları başladı
Azərbaycan və Rusiyanın Fövqəladə Hallar nazirliklərinin (FHN) əməkdaşları Ağdam rayonunda birgə hazırlıq kurslarına başlayıblar.
Rakus.az xəbər verir ki, Azərbaycan FHN-in Quzanlı qəsəbəsində yerləşən Qarabağ Regional Mərkəzində işğaldan azad olan ərazilərin minalardan və partlamamış hərbi sursatlardan təmizlənməsi zamanı istifadə olunacaq texnikalara baxış keçirilib.
Azərbaycanın fövqəladə hallar nazirinin müavini, general-leytenant Ragim Lətifov jurnalistlərə müsahibəsində bildirib ki, Rusiya Federasiyasının Mülki Müdafiə, Fövqəladə Hallar və Təbii Fəlakətlərin Nəticələrinin Aradan Qaldırılması üzrə Nazirliyin xüsusi texnika və avadanlıqlarla təchiz olunmuş 20 nəfərdən ibarət şəxsi heyəti Fövqəladə Hallar Nazirliyinin Ağdam rayonunun Quzanlı qəsəbəsində yerləşən Qarabağ Regional Mərkəzində yerləşib. Artıq ərazilərin minalardan təmizlənməsi üçün hazırlıq işləri başa çatmaq üzrədir. Hazırlıq işləri başa çatdıqdan sonra həmin əməkdaşlar FHN-in əməkdaşları ilə birlikdə Ağdam rayonunun ərazisində ayrılmış 100 hektar ərazini minalardan və partlamamış sursatlardan təmizlənmə əməliyyatlarına başlayacaqlar. Eyni zamanda, Rusiyadan gəlmiş mütəxəssislər FHN-in müvafiq qurumlarının 30 nəfərdən ibarət şəxsi heyəti üçün hazırlıq kurslarına başlayıb. Kurslar başa çatdıqdan sonra nazirliyin əməkdaşlarına müvafiq sertifikatlar təqdim ediləcək.
Rusiya Federasiyası Mülki Müdafiə, Fövqəladə Hallar və Təbii Fəlakətlərin Nəticələrinin Aradan Qaldırılması üzrə Nazirliyinin Ağdam rayonu ərazisində minatəmizləmə əməliyyatlarında iştirak edəcək “Lider” Mərkəzinin rəhbəri, general-mayor Anatoli Savvin isə deyib: “Üçtərəfli razılaşmaya uyğun olaraq Azərbaycan tərəfinə qaytarılan ərazilərin minalardan təmizlənməsi məqsədilə yanvarın 4-də 20 nəfərlik heyətlə gəlmişik. Qrup humanitar minatəmizləmə əməliyyatlarını icra etmək üçün lazımi texniki avadanlıqlarla təchiz olunub”.
A.Savvin qeyd edib ki, üç ay müddətində humanitar minatəmizləmə əməliyyatı icra ediləcək, zərurət olacağı təqdirdə isə razılaşma əsasında bu müddət uzadıla bilər.
