Atama deyin oğlu kişi kimi şəhid oldu – LEYTENANT
Həmidov Rəsman Mərdan oğlu 1998-ci ildə Şamaxı rayonunda anadan olub və Qaradağ rayonu, Müşfiqabad qəsəbəsində yaşayıb. Qəsəbədəki 320 saylı orta məktəbdə oxuyub. Uşaqlıqdan vətənpərvər böyüyən Rəsmanın ən böyük arzusu işğal altında olan torpaqlarımızın azad olunması və ölkəmizin ərazi bütövlüyünün pərpa edilməsi idi. Arzu və istəklərini ədəbi yaradıcılığında qələmə alan igidimiz gələcəkdə hərbçi olmaq üçün Cəmşid Naxçıvanski adına hərbi liseyə dail olur. Hərbi Akademiyanı da əla qiymətlərlə oxuyur. 2019-cu ildə isə leytenant rütbəsində zabit kimi hərbi xidmətə başlayır.
İkinci Vətən müharibəsində düşmənə tutarlı cavab vermək üçün Respublika Prezidenti, Ali Baş Komandan İlham Əliyevin göstərişlərinə vətənpərvər zabit kimi can-başla əməl edir. Bir sıra ağır döyüşlərdə igidlik göstərir, düşmənin mühasirəsinə düşən 30-dan çox əsgərimizi dəqiq kordinatları ilə xilas edir. Cəbrayıl rayonunun azad olunmasında xüsusi xidmətləri ilə seçilir. Hadrut istiqamətində gedən döyüşlərdə isə düşmənin vətənimizə atdığı gülləyə sipər olaraq qəhrəmancasına ŞƏHİDLİK zirvəsinə yüksəlir. Son sözünü isə bu olub: “Atama deyin, oğlun kişi kimi şəhid oldu”. Məhz bu səbəbdən də babası Lətif kişi, atası Mərdan müəllim kimi bütün doğmaları və onu yaxından tanıyan hər kəs Rəsman Həmidovun igidliyi ilə qürur duyur.
Ailnin tək oğlu və nişanlı olan şəhidimiz artıq qəhrəmanlıq simvoluna çevrilib. Təhsil aldığı 320 saylı orta məktəbin pedaqoji kollektivi və şagirdləri də onun igidliyi ilə fəxr edir, hər bir gəncə nümunə olan həyat yolunu daim qəlblərində yaşadacaqlarını və gələcək nəsillərə ötürəcəklrini bildirirlər. Çünki ŞƏHİDLR ölməz, VƏTƏN bölünməz.
Azərbaycan Respublikasının Prezidenti, Ali Baş Komandan İlham Əliyevin sərəncamı ilə Rəsman Həmidovun qəhrəmanlığı yüksək qiymətləndirilib, və o, ölümündən sonra “Vətən uğrunda” və “Cəbrayılın azad olunmasına görə” medalları ilə təltif olunub.
