Siyasi 26.01.2024 16:27

AŞPA platformasında baş verənlər Ermənistanı revanşizmə həvəsləndirir – Əli Hüseynli

Ölçü

A+ A- A

Təəssüf doğuran haldır ki, son zamanlar bir sıra beynəlxalq təşkilatlarda, xüsusilə Avropa Şurasında (AŞ) və ermənipərəst dövlətlərdə ölkəmizə qarşı qərəzli münasibətlərin intensivləşməsi müşahidə olunur. Məlum olduğu kimi, bir neçə gün bundan öncə – yanvarın 22-də – Avropa Şurası Parlament Assambleyasının (AŞPA) qış yarım-sessiyasının açılış günündə Almaniya təmsilçisi, Sosialistlər siyasi qrupunun rəhbəri Frank Şvabe tərəfindən irəli sürülmüş təşəbbüs əsasında ölkəmizin nümayəndə heyətinin etimadnamələri təsdiq edilməmişdir. Ötən il oktyabrın 12-də “Dağlıq Qarabağda humanitar vəziyyət” adlı həqiqət və faktlardan uzaq, erməni təbliğatının əsas elementlərini təkrarlayan, yalan və iftira dolu qətnamə və tövsiyə sənədi qəbul etməsindən sonra AŞPA-nın atdığı bu növbəti addım ölkəmizə qarşı yönəlmiş əsassız hücumların sistemli səciyyə daşıdığını göstərir. Parlament Assambleyası öz qərarını 7 fevralda Azərbaycanda keçiriləcək növbədənkənar prezident seçkilərini müşayiət etməyə dəvət edilməməsi, ölkədə “siyasi məhbus”ların olması ilə əlaqələndirsə də, bu, sadəcə, onun öz davranışına bəraət qazandırmaq üçün əl atdığı bəhanələrdir. Görünən isə odur ki, ötən ilin sentyabrında Qarabağda həyata keçirilmiş bir günlük lokal xarakterli antiterror tədbirlərindən sonra Azərbaycanın öz gücünə ərazi bütövlüyünü və konstitusiya quruluşunu tam şəkildə bərpa etməsi və beynəlxalq müstəvidə sərgilədiyi müstəqil siyasət bəzi xarici dairələrin uzağa gedən planlarını pozmuş və qıcıq yaratmışdır.

AŞPA-da formalaşan belə xoşagəlməz mühit fonunda Azərbaycan nümayəndə heyətinin qurumu qeyri-müəyyən müddətə tərk etmək barədə qərarı da məhz Parlament Assambleyasının kənar təsirlər altında ikili standartlarla idarə olunmasına, ardıcıl olaraq qəbul etdiyi aktların beynəlxalq hüququn norma və prinsiplərinə zidd olmasına, xüsusilə də ölkəmizin beynəlxalq səviyyədə tanınmış sərhədləri daxilində müstəqilliyinə, suverenliyinə və ərazi bütövlüyünə hörmətlə bağlı öhdəliklərinə riayət etməməsinə adekvat cavabdır.

Tamamilə aydındır ki, Azərbaycanın yüksələn nüfuzunu və əldə etdiyi tarixi uğurları həzm edə bilməyən Fransanın fitnəsinə uyan Avropanın bir sıra digər ölkələrinin, o cümlədən Almaniyanın ermənipərəst siyasətçiləri Azərbaycanın regiondakı yeni reallıqlara uyğun başlatdığı sülh prosesinə dəstək vermək əvəzinə, beynəlxalq erməni mafiyasının maliyyə imkanlarına əyilərək bu prosesə süni əngəllər törətməyə və ölkəmizin haqq işinə kölgə salmağa çalışırlar. Bu baxımdan ölkəmizə qarşı düşmən mövqedə durmaqda davam edən Fransanın və Ermənistanın digər xarici havadarlarının təhrik siyasəti AŞPA-nın ölkəmizə qarşı bəslədiyi ədalətsiz yanaşmanı körükləyən əsas amil kimi görünür.

Digər təhlükə ondan ibarətdir ki, AŞPA platformasında baş verənlər Ermənistanı Azərbaycana qarşı növbəti təcavüzə və revanşizmə həvəsləndirir. Ona görə də ölkəmizə qarşı nümayiş etdirilən belə ədalətsiz yanaşma heç bir hüquqi çərçivəyə sığmır və bu, Avropa Şurası daxilində demokratik dəyərlərin aşındığının bariz nümunəsi kimi dəyərləndirilməlidir.

Azərbaycan isə bu quruma üzv olduğu 23 il ərzində üzərinə götürdüyü bütün öhdəlikləri yerinə yetirmiş, cəmiyyətin demokratik dəyərlər üzərində dinamik inkişafını təmin etmişdir. Bu gün yalnız öz gücü ilə ərazi bütövlüyünü və konstitusiya quruluşunu tam şəkildə bərpa etmiş ölkəmiz heç bir beynəlxalq təşkilatdan və dövlətdən asılı deyil, əksinə, Avrasiya coğrafiyasında sanballı geosiyasi mövqeyə malik olmaqla Avropada enerji təhlükəsizliyinə mühüm töhfə verən vacib aktora çevrilmişdir. Ona görə də Ulu Öndər Heydər Əliyevin uzaqgörənliklə söylədiyi “Azərbaycan Avropaya nə qədər lazımdırsa, Avropa da Azərbaycana bir o qədər lazımdır” fikri bütün məsələlərdə beynəlxalq təkilatlarla münasibətlərin şaquli deyil, məhz üfüqi istiqamətdə formalaşmasının zəruriliyini nəzərdə tutan siyasətin ifadəsi kimi bu gün də öz aktuallığını qoruyub saxlayır.

Odur ki, yeni geosiyasi reallıqlar şəraitində həmin siyasi doktrinaya uyğun inamlı addımlar atan, bütün məsələlərdə müstəqil siyasət yürüdən və öz doğru yolu ilə gedərək heç kimə baş əyməyən qalib Azərbaycanla diktə və təhdid dilində danışmaq mümkün deyil. Eyni zamanda, Avropa Şurasının mexanizmlərindən Azərbaycana qarşı istifadəyə yönəlmiş məsuliyyətsiz cəhdlər Azərbaycanın regionda davamlı sülhün təmin edilməsi istiqamətində fəaliyyətini davam etdirmək əzmini sarsıda bilməz. Ona görə də AŞPA xoş niyyətlərə söykənən ortaq maraqlar naminə Azərbaycana qarşı münasibətdə obyektiv reallıqlardan çıxış etməli və ədalətsizliyə, ikili standartlara, qərəzə yol açan hərəkətlərdən çəkinməlidir.