Aydın Kərimov Prezidenti məlumatlandırdı
Azərbaycan və Gürcüstanda “Schlumberger” şirkətinin baş meneceri Aydın Kərimov Bakıda keçirilən Beynəlxalq Xəzər Neft və Qaz sərgisi çərçivəsində Azərbaycan prezidenti İlham Əliyevi Xəzər dənizində qazılmış ən dərin quyu barədə məlumatlandırıb.
Rakus.az xəbər verir ki, A.Kərimovun sözlərinə görə, aprelin 15-də “Abşeron” yatağında ABD-001 quyusunun qazılması zamanı 7 min 411 metr dərinliyə çatmaq mümkün olub.
Onun sözlərinə görə, qazma işləri yataqdakı ehtiyatın həcmini ölçmək məqsədilə aparılıb.
A.Kərimov əlavə edib ki, “Abşeron” yatağı qaz kondensatıdır və Xəzər şelfinin 500 metr dərinliyində yerləşir.
“Yataq Bakıdan 100 kilometr cənub-şərqdə və “Şahdəniz” yatağından 25 kilometr şimal-şərqdə yerləşir. Yataqdakı qaz ehtiyatları 350 milyard kubmetr, kondensatlar isə 45 milyon ton həcmində dəyərləndirilir”, – baş menecer əlavə edib.
O bildirib ki, lüləli qiymətləndirmə quyusu Heydər Əliyev adına 6-cı nəsil yarımsəviyyəli qazma qurğusu tərəfindən qazılır. İşlərin 2019-cu ilin oktyabrında yekunlaşdırılması planlaşdırılır.
A.Kərimov bundan əvvəlki rekord sayılan “Şahdəniz” yatağında 2008-ci ildə qazılmış SDX4 (7 min 300 metr) quyusundan da danışıb. O əlavə edib ki, həmin vaxt da qazma işlərində “Schlumberger” şirkətinin texnologiyalarından istifadə edilib. (Oxu.az)
