Atəşkəs Tripolidə böyük sevinclə qarşılandı - FOTO
Qondarma Liviya Milli Ordusunun komandanı Xəlifə Haftarın tabeliyindəki qüvvələr Türkiyə və Rusiyanın atəşkəslə bağlı birgə çağırışını qəbul edib.
Rakus.az xəbər verir ki, bununla da Bakı vaxtı ilə gecə saat 02-dən etibarən tərəflər arasında atəşkəs elan olunub.
Bu barədə Xəlifə Haftarın tabeliyindəki qüvvələrin sözçüsü Əhmət əl-Mismari sosial media vasitəsilə məlumat verib. O, yaydığı müraciətdə Liviyanın qərbində hərbi əməliyyatlarla bağlı atəşkəs təklifini qəbul etdiklərini, ancaq qarşı tərəf atəşkəsi pozarsa buna sərt şəkildə cavab verəcəklərini bildirib.
Atəşkəsin əldə olunması barədə xəbər paytaxt Tripolidə böyük sevinclə qarşılanıb, atəşfəşanlıq olub.
Liviyanın legitimliyi beynəlxalq səviyyədə tanınan, BMT-nin dəstəyi ilə paytaxt Tripolidə yaradılmış Milli Birlik Hökumətinin (MBH) Nəqliyyat Nazirliyi ölkənin dünya ilə yeganə əlaqə vasitəsi olan Mitiqa hava limanını yenidən aviareyslər üçün açıq elan edib.
Atəşkəs elanından sonra Türkiyə və Rusiya prezidentləri Rəcəb Tayyib Ərdoğan ilə Vladimir Putin arasında telefon danışığı olub. Dövlət başçıları Liviyada yaranan vəziyyəti müzakirə ediblər.
Liviyadakı böhranın nizamlanması ilə bağlı danışıqlar prosesində fəal iştirak edən İtaliyanın Baş Naziri Cüzeppe Konte də atəşkəsin elan olunmasından sonra yaydığı açıqlamada bildirib: “Haftarın tabeliyindəki qüvvələr atəşkəsi qəbul etdi. Bu, böhranın siyasi yolla həlli istiqamətində ilk addımdır. Bu sahədə qət edilməli olan çox yol var, amma istiqamət doğrudur”.
Xatırladaq ki, Liviyadakı böhranın həlli ilə əlaqədar Romada həm MBH-nin Baş Naziri Fayiz əs-Sərrac, həm də Xəlifə Haftar ilə görüşlər keçirilmişdi. Bundan başqa, Fransa Prezidenti Emmanuel Makron ilə Fayiz əs-Sərrac arasında telefon danışığı olmuşdu.
