Avropa “gələcəyin tankı”nı yaradır
Fransa və Almaniya yeni əsas döyüş tankının birgə hazırlanması haqqında razılığa gəlib.
Rakus.az xəbər verir ki, bu barədə Fransanın Silahlı Qüvvələr naziri “Twitter” səhifəsində yazıb.
Müvafiq saziş Almaniyanın Müdafiə naziri Anneqret Kramp-Karrenbauerin iştirakı ilə məsafədən imzalanıb. Parlinin sözlərinə görə, hər iki ölkənin ordusu arasında əməkdaşlıq nəticəsində 2035-ci ildən geniş kommunikasiya imkanlarına malik müasir Avropa tankı əldə etmək mümkün olacaq. Nazir hesab edir ki, beləliklə, Avropa öz müdafiəsini “konkret layihələr və qarşılıqlı etimad” əsasında qura biləcək.
TASS Fransanın “La Tribune” nəşrinə istinadən yazır ki, “gələcəyin tankı” nın yaradılması haqqında sazişin imzalanması hələ dörd il bundan əvvəl baş tutmalı idi, lakin tərəflər bütün bu müddətdə sifarişlərin onların sənaye müəssisələri arasında necə bölüşdürüləcəyi barədə razılığa gələ bilmirdilər. Bundan başqa, Almaniya Yaxın Şərqə perspektivli döyüş maşınının göndərilməsinə qarşı çıxıb.
Birgə istehsal ediləcək yeni tankın Fransanın “AMX-56 Leclerc” ağır tankını, həmçinin Almaniyanın “Leopard 2”ni əvəz edəcəyi gözlənilir.
