Ardanış kənd icmasının növbəti iclası keçirilib - FOTO
Fevralın 22-də Ardanış Kənd İcmasının yeni ofisində – “Premyer Palas Hotel”də İdarə Heyətinin növbəti iclası kecirilib.
Rakus.az xəbər verir ki, iclası icmanın sədri professor Məhəmməd Kərimov açaraq gündəlikdəki məsələləri elan edib. O deyib ki, iclasda Qadınlar Şurasına yeni sədrin seçilməsi, Qəyyumlar Şurasının yaradılması və sədrinin seçilməsi, Nəzarət-Təftiş Komissiyasının yaradılması, eləcə də qarşıdan gələn Novruz bayramı ilə əlaqədar tədbirlərin keçirilməsi ilə bağlı məsələlər müzakirəyə çıxarılır.
İdarə Heyəti üzvlərinin fikirləri dinlənildikdən sonra şura sədrliyindən könüllü istefa verən Mahirə Qurbanovanın yerinə şair-publisist Sona İsmayılova Qadınlar Şurasına, İman Abduyev isə Qəyyumlar Şurasına sədr seçiliblər. Eyni zamanda, 5 nəfərdən ibarət Nəzarət-Təftiş Komissiyası yaradılıb.
Sonra ayrı-ayrı şuralar üzrə məlumatlar verilib.
M.Kərimov iclasa yekun vuraraq kənd icması tərəfindən gələcəkdə aztəminatlı ailələrə, müalicəyə ehtiyacı olan insanlara, təhsil üzrə fərqlənən tələbələrə, həmçinin şəhid ailələrinə dəstək verilməsinin vacibliyini söyləyib.
Professor Ardanış kəndi üzrə siyahıyalınmanın aparılmasının zəruriliyini vurğulayıb, bu il mart ayının 15-də Ardanış Kənd İcmasının Novruz bayramı ilə əlaqədar geniş bayram tədbirinin keçiriləcəyini bildirib və bununla bağlı nümayəndələrə müvafiq tapşırıqlar verib.
