“Bu dövrdə kim anasına baxır?!” – O VAXTLAR - VİDEO
Baku TV-nin Xəbərlər Departamentinin müəllif və yaradıcı bölməsinin təqdimatı ilə müəllif-aparıcı Gülnarə Aydının “O Vaxtlar” verilişinin növbəti buraxılışı hazırlanıb.
Rakus.az xəbər verir ki, verilişin budəfəki qonağı Novxanı sakini Şahsənəm Əliyeva olub.
Ş.Əliyeva keçmişdəki ailə dəyərlərindən, gəlinlik dövrünün çətinliklərindən və o dövrün adət-ənənələrindən söz açıb.
Həyat yoldaşı ilə keçirdiyi illərdən və onun itkisindən bəhs edən Şahsənəm xanım xatirələrini bölüşüb: “Həyat yoldaşımı itirməyimdən 3 il keçir. Nə dəyişdi həyatımda? Heyif, kaş ki ölməyəydi. 86 yaşı var idi, elə bilirdim, heç vaxt ölməyəcək. Cəmi 10 günün içində canını tapşırdı. Qadına sevgi lazımdır. Sevgi isə bir-birimizə, gördüyümüz işə qiymət verməkdir. Biz elə yaşamışıq”.
Ailəsinin qarşılaşdığı repressiya faciəsini və böyüklərə qulluq etdiyi illəri xatırlayan Ş.Əliyeva sözlərini belə yekunlaşdırıb:
“1937-ci ilin repressiya dövründə qayınanamın atasını aparıb güllələdilər. 16 yaşlı oğlunu da atasının qoluna bağlayıb apardılar, bir daha xəbər tuta bilmədik. Qayınanamın 100 yaşlı anası tək qalmışdı, onu 1937-ci ildən qalan həmin o evə gətirdik. O vaxt nə qaz var idi, nə su. Suyu quyudan gətirərdik. Həmin evdə o qoca qadına 14 il baxdım. Bircə bilsəydi ki, oğlunun qəbri haradadır, bəlkə də bu qədər ağlamazdı. 114 yaşında rəhmətə getdi. İndi mən onun yurdunda oturmuşam. Allah bütün balalarımızı, gənclərimizi qorusun”.
Veriliş oktyabrın 16-da Baku TV-nin YouTube kanalında yayımlanıb.
Ətraflı videoada tanış ola bilərsiniz:
