“Qədim xristian Udi- Alban icması bu gün ermənilər üçün böyük bəladır” - FOTO - VİDEO

Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “Norveçlilər udilərdən nələri öyrəndilər” adlı veriliş efirə gedib.

Rakus.az xəbər verir ki, verilişdə Alban-Udi Xristian dini icmasının sədri Robert Mobili Alban xristian irsinin erməni kilsəsinə tabe edilməsindən, udilərin tarixi və mədəni irsindən söz açıb.

O deyib ki, Azərbaycan tarixən çox millətli, çox konfessiyalı ölkədir: “Udilər tarixi sınaqlardan keçərək öz dillərini və Alban kilsəsini qoruyublar. Udi mədəni irsində qədimdən türk izləri var və bu gün də yaşayır. Qədim xristian Udi-Alban icması bu gün ermənilər üçün böyük bəladır. Alban kilsəsinin bərpası erməni siyasəti üçün böyük təhlükədir və erməni yalanlarının darmadağın olmasına səbəb olacaq”.

Onun sözlərinə görə, erməni kilsəsi həvvari deyildi və tarixi, kanonik ərazisi Fərat çayından aşağıdır: “    Ərəblər ermənilərdən istifadə edib Alban kilsəsini zəiflətmək istəyirdilər.         Ərəb xilafəti erməni kilsəsinə bu səbəbə görə dəstək verdi. 1836-cı il Nikolayın fərmanı ilə Alban xristian irsini erməni kilsəsinə tabe edildi. Sinayda tapılan palimpsestlər sübut etdi ki, alban əlifbası erməni yazısından daha qədimdir. Sinayda tapılan V əsr yazıları Albaniyanın gerçək tarixini üzə çıxardı. Sinay dağının Qafqaz Albaniya Palimpsestləri erməni tarixinin saxtalığını sübut etdi. Musa Kalankatlu, Mxitar Qoş alban idilər və ermənilərə heç bir aidiyyatları yox idi. Belçikada çap olunan kitab yalançı erməni tarixini biabır etdi”.

R.Mobili Norveç səyyahı Tur Heyerdalın Qəbələ rayonunun Nic kəndinə səfərinin əsas məqsədinə, norveçlilərin udilərdən nələri öyrəndiyinə aydınlıq gətirib.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş yanvarın 15-də saat 20:30-da Baku Tv-nin efirində və saat 21:30-da Youtube kanalında yayımlanıb.