Andiçmə ömürümüzün unudulmaz anına çevrilir - FOTO
Bu günlərdə Müdafiə Nazirliyinin illik fəaliyyət planına uyğun olaraq, Azərbaycan Ordusunun təlim hissə və bölmələrində gənc əsgərlərin andiçmə mərasimi keçirildi.
Hərbi hissədə və onun ətrafında isə bu hazırlıq bir neçə gün əvvəlcədən hiss olunurdu. Övladlarının və yaxınlarının andiçmə mərasiminin sevincini yaşamaq üçün gələn qonaqlara əvvəlcədən tədbirlər görülürdü. Müdafiə Nazirliyinin tabeliyində olan hərbi hissələr isə bu mərasimə xüsusi hazırlaşmışdı. Hərbi hissənin ərazisində və yaxınlığında valideynlərin rahatlığı üçün müvafiq tədbirlər görülmüşdü. Çadırlar qurulmuş, görüş yerləri düzəldilmiş, maşınlar üçün dayanacaqlar hazırlanmışdı.
Andiçmə mərasimi isə bütün bunların sanki kuliminasiya nöqtəsi idi. Valideynlərin bu müqəddəs mərasimi yaxından izləmək imkanı olsun deyə hərbi hissə komandanlığı tərəfindən hər cür lazımi şərait yaradılmışdı. Əsgərlərin hazırlığı isə bir an belə heç kimin diqqətindən yayınmırdı. Bir sözlə, andiçmə mərasimi hər kəsin ömür tarixinin unudulmaz anına çevrilir, illərlə yaddaşlarda yaşadılır.
Əvvəlcə ümummilli lider Heydər Əliyevin və Vətənimizin azadlığı və ərazi bütövlüyü uğrunda şəhid olan igidlərimizin xatirəsi bir dəqiqəlik sükutla yad edildi, Dövlət Himni ifa olundu. Döyüş Bayrağı sıra meydanına gətirildi. Gənc əsgərlərimiz təntənəli surətdə gurultulu səslərlə hərbi andı qəbul etdilər.
Fikrimizcə fotoaparatın yaddaşına həkk olunan əsgərlərlə valideynlərin görüşünü isə fotolarda izləmək daha maraqlı olar.
