Ankarada noqay şairinin şeirlər toplusu 12 dildə işıq üzü gördü
Ankarada Beynəlxalq Türk Mədəniyyəti Təşkilatının (TÜRKSOY) mərkəzi qərargahında görkəmli noqay şairi Kadriyə Temirbulatovanın anadan olmasının 70-ci ildönümü münasibətilə anma mırasimi keçirilib.
Rakus.az xəbər verir ki, tədbirdə, həmçinin şairin TÜRKSOY tərəfindən 12 dildə nəşr olunan “İgidlərin dastanıyam” şeirlər toplusu təqdim olunub.
TÜRKSOY-un Baş katibi Düsen Kaseinov, Avrasiya Yazıçılar Birliyinin sədri Yaqub Öməroğlu, Dağıstan Respublikasının (RF) Noqay bölgəsinin mədəniyyət müdiri Sabirat Abubekirova, Dağıstan Yazıçılar Birliyinin sədr müavini Marina Ahmedova-Kolyubakina və başqalarının çıxışları dinlənilib.
Şairənin zəngin mənalı həyat yolundan bəhs edən natiqlər təqdim olunan nəşrin əhəmiyyətini yüksək dəyərləndiriblər.
Tədbirdə şairin şeirlərindən nümunələr oxunub.
Rəngarəng bədii proqramla davam edən tədbirdə şairənin vətənindən, Rusiyanın ayrı-ayrı bölgələrindən, eləcə də türkdilli ölkələrdən gələn şair və sənətçilərdən ibarət geniş tərkibli nümayəndə heyəti iştirak edib.
Xatırladaq ki, TÜRKSOY-un təşkilatçılığı ilə Türkiyənin Əskişəhər və Yalova şəhərlərində də “Kadriyə Temirbulatova-70” mövzusunda tədbirlər keçirilib. Yalova şəhərinin mərkəzi küçələrindən birinə şairənin adı verilib.
