Ardanış kənd icmasının ilk iclası keçirilib - FOTO
Bakıda “Şahənşah” Şadlıq Sarayında Qərbi Azərbaycanın Göyçə mahalının Ardanış kənd icmasının geniş tərkibli ilk iclası keçirilib.
Rakus.az xəbər verir ki, iclası giriş sözü ilə açan Qərbi Azərbaycan İcmasının (QAİ) Qəyyumlar Şurasının üzvü, iş adamı Rəşid Süleymanov Qərbi Azərbaycan İcmasının (QAİ) rayon və kənd icmalarının təşkilati strukturu haqqında məlumat verib, rayon və kənd icma sədrlərinin fəaliyyət istiqamətləri, hüquq və vəzifləri barədə danışıb.
İclası aparmaq üçün söz Binəqədi rayon M.Ə.Rəsulzadə qəsəbə bələdiyyəsinin sədri Hümbət Hüseynova verilib. O, kənd icmalarının yaradılması və sədrin seçilməsi mexanizminin QAİ-nin Əsəsnaməsi əsasında reallaşdırıldığını, bu məqsədlə icmanın İdarə Heyəti üzvlərinin və icma üzvlərinin seçilməsi ilə bağlı rəy və təkliflər dinlənilməsinin zəruri olduğunu söyləyib.
Ardanış əsilli ziyalılar Tanrıverdi Paşayev, Aqil Kərimov, Əli Vəliyev, Fəxrəddin Hacıyev, Bayraməli Qurbanov, Daşdəmir Əliyev, Ələddin Hacıyev, Əsgər İbrahimov, Bayraməli Həsənov, Hüseyn İsmayılov, Səməd Axundov, Qədim Məhərrəmov və başqaları öz təkliflərini səsləndirib, kənd icmalarında İdarə Heyəti üzvlərinin əhalinin sayına görə seçilməsinin zəruriliyini söyləyib və sədrin bu üzvlər arasından seçilməsinin daha məqsədəuyğun olduğunu deyiblər.
Onlar icmanın nümunəvi fəaliyyəti naminə üzərlərinə düşən işləri məsuliyyətlə yerinə yetirəcəklərini ifadə ediblər.
Beləliklə, səsvermə yolu ilə 21 nəfərdən ibarət İdarə Heyəti seçilib, icmanın Ağsaqqallar, Qadınlar və Ziyalılar şuralarının tərkibi müəyyənləşdirilib.
Qərara alınıb ki, iclasda razılaşdırılmış məsələlər protokollaşdırılıb müvafiq dairələrə göndəriləcək, icma sədri müəyyənləşdikdən sonra digər strukturların formalaşdırılması da mümkün olacaq.
Sonda Göyçə mahalının böyük yaşayış məskənlərindən olan, zəngin tarixi keşmişə sahib Ardanış kənd əhalisinin keçdiyi yol ilə bağlı məlumatlar verilib, QAİ-nin yaradılması və fəaliyyəti üçün ölkə Prezidentinə minnətdarlıq bildirilib.
Əsgər Əlioğlu
