ABŞ ilə Türkiyənin raket gərginliyi – 35 dəqiqəlik görüş – TƏHLİL - FOTO

Xəbər verdiyimiz kimi, bu il iyunun 29-da Yaponiyada ABŞ və Türkiyə prezidentlərinin görüşü olub.

Rakus.az xəbər verir ki, görüş “Böyük iyirmilik” (G20) ölkələrinin Osakada keçirilən sammiti çərçivəsində baş tutub.

Donald Tramp ilə Rəcəb Tayyip Ərdoğan Türkiyənin Rusiyadan S-400 raket kompleksi almaq planını, iki ölkə arasındakı strateji münasibətlər və ticarət əlaqələrini müzakirə ediblər.

Donald Tramp Türkiyənin Rusiyadan S-400 raketləri almaq planının “problem olduğunu” deyib və  bildirib ki, bu məsələ ətrafında çətin vəziyyət yaranıb və mümkün sanksiyalar müzakirə olunur.

ABŞ prezidenti qeyd edib ki, onlar müxtəlif həll yolları üzərində işləyirlər.

O bildirib ki, onlar əsasən iki ölkə arasındakı ticarət əlaqələrinin genişləndirilməsini müzakirə ediblər.

“Bizim aramızda böyük ticarət əlaqələri var və biz Türkiyə ilə ticarət dövriyyəsinin 4 dəfə artırılmasını gözləyirik. Onlar mahir ustadırlar, gözəl məhsulları var və biz buna geniş imkanlar yaradacağıq. Biz həmçinin hərbi təlim keçirir, onlar bizdən çoxlu hərbi avadanlıqlar alırlar”,- Tramp deyib.

Türkiyə Prezidenti Rəcəb Tayyib Ərdoğansa deyib ki, hazırda iki ölkə arasında ticarət dövriyyəsi 75 miyard dollar civarındadır və biz müdafiə sənayesi sahəsində çoxlu addımlar atmalıyıq: “Ən vacibi isə odur ki, biz strateji tərəfdaşıq.Və strateji tərəfdaşlıq həmçinin bizi bir çox sahələrdə həmrəy olmağa çağırır. Və tam əminəm ki, bizim həmrəyliyimiz davam edəcək”.

Donald Tramp isə vurğulayıb ki, iki ölkə arasında 75 milyard dollarlıq ticarət dövriyyəsi azdır və hesab edirəm ki, bu tezliklə 100 milyard dolları keçəcək.

Görüş, təxminən, 35 dəqiqə çəkib.

Xatırladaq ki, Türkiyənin Rusiyadan S 400 raket kompleksi almaq planı Vaşinqtonun ciddi narazılığına səbəb olub. ABŞ, Türkiyənin bu plandan daşınması üçün Ankaraya iyulun 31-dək vaxt verib. Əks halda Birləşmiş Ştatlar Türkiyəyə F-35 təyyarələrinin satışını dayandıra bilər.

Vaşinqton və onun NATO-dakı müttəfiqləri deyirlər ki, Rusiya istehsalı olan S-400 zenit-raket kompleksi F-35 təyyarələri barədə məxfi informasiyalar əldə edə bilər . Bundan başqa ABŞ və NATO rəhbərlikləri dəfələrlə bəyan ediblər ki, həmin kompleksləri NATO ordusuna uzlaşdırmaq mümkün deyil.

Türkiyə Prezidenti Racep Tayyip Erdogansa dəfələrlə bəyan edib ki, Ankara Rusiya ilə sövdələşmədən imtina etməyəcək.

ABŞ rəsmiləri, Türkiyənin ABŞ istehsalı olan “Patriot” hava-hücumlarından müdafiə sisteminə dönməsini tələb edirlər.

Ərdoğan isə deyib ki, Ankara bunun mümkünlüyünə yalnız o halda baxa bilər ki, Vaşinqtonun bu müqavilə ilə bağlı şərtləri, Moskvanınkı kimi yaxşı olsun.

Son vaxtlar ABŞ-la Türkiyə arasındakı münasibətlərin gərginləşdiyi müşahidə olunur.