Ali məktəblərə qəbul imtahanları avqustun 13-14-də keçiriləcək – RƏSMİ
“Qəbul imtahanları, təxminən, avqustun 13-14-də başlaya bilər. Bu tarix də hələ dəqiq deyil. Çünki buraxılış imtahanlarının hamısının nəticələri elan olunmalıdır”.
Rakus.az xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə növbəti buraxılış (qəbul) imtahanlarının keçirilməsi ilə bağlı danışarkən deyib.
O bildirib ki, avqust ayında dörd gün ərzində qəbul imtahanlarının keçirilməsi planlaşdırılır.
M.Abbaszadə bildirib ki, avqustun 10-dək rezidenturaya qəbul imtahanlarının keçirilməsi nəzərdə tutulur: “Dövlət qulluğu ilə əlaqəli müəyyən təxirə salınan imtahanların da avqustun 1-dən 10-na qədər baş tutması nəzərdə tutulur”.
Onun sözlərinə görə, iyulun 23-24-də keçirilməsi nəzərdə tutulan buraxılış (qəbul) imtahanlarında 60 min şəxsin iştirak etməsi nəzərdə tutulub.
DİM sədri bildirib ki, karantin rejimi müddətində, təxminən, 143 min insan üçün imtahan keçirilib: “120 mini öz nəticələrini əldə edib. Bu həftələrdə yerdə qalanların da nəticələri elan olunacaq. Növbəti həftə üçün imtahanların keçirilməsi üçün Nazirlər Kabineti yanında Operativ Qərargahdan icazə alınıb”.
M.Abbaszadə deyib: “Xaricə oxumağa getmək istəyib də attestat alan məzunlar ali məktəblərə qəbul imtahanlarında iştirak edə bilər. Təbii ki, onlar buraxılış imtahanında iştirak etdikdən sonra qəbul imtahanına buraxılacaq. Həmin şəxslərdən kimsə abituriyent kimi imtahan üçün iş veribsə, müsabiqədə iştirak edə bilər”.
