Ağbaba mahalı necə parça-parça edildi?
Bu gün Qərbi Azərbaycan Xronikası layihəsi çərçivəsində növbəti süjet efirə gedib.
Rakus.az xəbər verir ki, “Casus Mikoyanın kütləvi Ağbaba repressiyası” adlı süjetdə qədim tariximizi sübut edən, lakin mənfur ermənilərin “mənimsədiyi” Ağbaba mahalı haqqında söz açılır.
Bildirilir ki, indiki Ermənistan ərazisində tarixən azərbaycanlıların sıx yaşadığı coğrafi məkanlardan biri də Ağbaba mahalıdır.
1930-cu illərdə Ağbabanın və digər bölgələrin 50 mindən çox türk əhalisi ailəliklə Qazaxstan çöllərinə sürgün edilib.1937-ci ilin payızında Ermənistanda güclənən repressiyaların dalğasının fonunda azərbaycanlılar daha ağır zərbə alıblar.
Süjetdə vurğulanır ki, xalq casusu Mikoyanın rəhbərliyi ilə keçirilən “təmizlənmə” prossesində 1938-ci ildə Vedibasar, Zəngibasar, Qəmərli, Eçmiədzin, Ağbaba rayonlarının Türkiyə ilə həmsərhəd kəndlərində yaşayan 10 minlərlə azərbaycanlı kütləvi surətdə repressiyaya məruz qalıb: “Nəhayət, Ermənistan baş bilənləri 1940-cı illərin sonu, 1950-ci illərin əvvəllərində köçürmə, 1988-ci ildə isə azərbaycanlılara qarşı sonuncu deportasiya siyasətini reallaşdırdılar. Bununla da ermənilərin terror və köçürmələri nəticəsində Ağbaba mahalı yaxınlığında azərbaycanlılara məxsus məkan qalmadı. Lakin əminik ki, 80 faizdən çox oğuz-türkünün yaşadığı bu qədim yaşayış məskəni öz sahibinə yenidən qovuşacaq”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Süjet mayın 24-də saat 19:30-da Baku Tv-nin efirində, saat 20:30-da isə Youtube kanalında yayımlanıb.
