Aşıq Ələsgər yaradıcılığına həsr olunmuş konsert - FOTO
Avqustun 23-də Dədə Ələsgər Ocağı İctimai Birliyinin icra etdiyi “Aşıq Ələsgər irsinin tanıdılması” layihəsi çərçivəsində Nizami Kino Mərkəzində Qərbi Azərbaycanın ustad aşıqlarının yaradıcılığına həsr olunmuş konsert keçirilib.
Rakus.az xəbər verir ki, konsert ziyalıların, mədəniyyət adamlarının, aşıqların, QHT və media nümayəndələrinin iştirakı ilə baş tutub.
Əvvəlcə Vətən yolunda canlarını qurban vermiş şəhidlərin əziz xatirəsi bir dəqiqəlik sükutla yad olunub.
İctimai Birliyin sədri Xətai Ələsgərli bildirib ki, aşıq sənəti Azərbaycanın milli kimliyinin qorunub saxlanılmasında öz dəsti xətti olan xalq sənətidir. Dünya, aşıq sənətini Azərbaycan mədəniyyətinin bir parçası olaraq qəbul edir. Ona görə də Qərbi Azərbaycanda da çox sevilən və Azərbaycanın ustad aşıqlarının əksəriyyətinin vətəni olan bu bölgənin saz-söz ustadlarının təbliğ olunması xalqımızın qərbi Azərbaycana olan münasibətinin bir ifadə formasıdır.
Bildirilib ki, layihənin əsas məqsədi Azərbaycan aşıq sənətini qərbi Azərbaycan aşıqlarının timsalında xalq arasında xüsusilədə yeniyetmə və gənclər arasında təbliğ etməkdir. Azərbaycan saz-söz sənəti hazırda da öz bədii təsir gücünü itirməyib, bu günün mədəni inkişaf prosesində onun da öz yeri var. Əgər ənənəvi havacat ancaq yarandığı bölgələrdə səslənirdisə və həmin bölgələr xaricində aşıq sənətini ancaq səfərə çıxmış ayrı-ayrı aşıqlar təbliğ edirdilərsə, bu gün artıq bu qapalılığa son qoyulub. Saz-söz sənəti müstəqil dövlət şəraitində vahid Azərbaycan milli mədəniyyətinin tamhüquqlu tərkib hissəsidir. Saz-söz ocağı olan tarixi-etnoqrafik bölgələrə və sənəti yaşadan ustad aşıqlara diqqət və qayğı, bədii-şifahi ənənələri qoruyub-yaşatmaq hər birimizin şərəfli borcudur.
O,.ümummilli lider Heydər Əliyevin Azərbaycanda ozan sənətinin yaşadılması, Dədə Ələsgər yaradıcılığına göstərdiyi dövlət diqqətindən danışıb., bu layihənin donoru olan Qeyri-Hökumət Təşkilatlarına Dövlət Dəstəyi Agentliyinə, eləcə də Dədə Ələsgər yaradıcılığına böyük dəyər verdikləri üçün iştirakçılara minnətdarlığını bildirib.
Sonra Azərbaycanın ozan sənətinin tanınmış nümayəndələri rəngarəng konsert proqramı ilə çıxış ediblər.
