“Qayınanam “kapriznıy” idi, kaş başqa cür danışardım” – O VAXTLAR - VİDEO
Baku TV-nin Xəbərlər Departamentinin müəllif və yaradıcı bölməsinin təqdimatı ilə müəllif-aparıcı Gülnarə Aydının “O Vaxtlar” verilişinin növbəti buraxılışı hazırlanıb.
Rakus.az xəbər verir ki, verilişin budəfəki qonağı Novxanı sakini Nazilə Quluzadə olub.
O, keçmişdəki ailə dəyərlərindən, uşaqlıq xatirələrindən və həmin dövrün evlilik adət-ənənələrindən danışıb.
Gəlin köçdüyü evdən və qayınanası ilə münasibətlərindən söz açan Novxanı sakini həmin dövrdə yaşadığı çətinlikləri bölüşüb:
“Mən 20 yaşımda elçilik yolu ilə Sumqayıta, böyük bir ailəyə – beş qayının olduğu evə gəlin köçdüm. Baldızlarım yaxşı qızlar olublar, onlarla yaxşı yola getmişik. Qayınanam bir az ərköyün idi, amma qayınanadır da, nə olsun? Mən də o vaxt kənd uşağı idim, ağlım kəsmirdi. İndiki ağlım olsaydı, deyirəm ki, kaş qayınanama başqa cür reaksiya verərdim. Bir hadisə baş verəndə heç nə demirdim, sakitcə ağlayırdım, sonra da acığım soyuyub gedirdi”.
Müasir dövrün gəlinləri ilə keçmişin gəlinləri arasındakı fərqlərə toxunan N.Quluzadə gənclərə dəyərli məsləhətlər də verib:
“İndiki gəlinlərlə o dövrün gəlinləri arasında böyük fərq var. İndiki gəlinlər bir az daha mərd, özünəinamlıdırlar. Özlərini müdafiə etməyi, fikirlərini açıq deməyi bacarırlar. Mən öz gəlinimdən çox razıyam. Onların işinə heç vaxt qarışmıram. Özləri hər şeyə qərar verirlər, mən də razılaşıram. Ailədə gərək səbirli olasan, dözəsən. Gənclərə də ilk növbədə Allahdan səbir diləyirəm”.
Veriliş oktyabrın 23-də Baku TV-nin YouTube kanalında yayımlanıb.
Ətraflı videoada tanış ola bilərsiniz:
