Avropa İttifaqının yeni viza qaydaları qüvvəyə mindi
Avropa İttifaqı (Aİ) ölkələrinə səfərləri sadələşdirən vizaların verilməsinin yeni qaydaları qüvvəyə minib.
Rakus.az xəbər verir ki, bu barədə məlumatı Avropa Komissiyasının (AK) mətbuat xidməti yayıb.
AK-nın bəyanatında deyilir: “Avropa İttifaqının qısamüddətli vizaların verilməsi ilə bağlı yeni qaydaları bütün dünyada 2020-ci il fevralın 2-dən tətbiq edilir. Bu qaydalar Avropaya getmək istəyən leqal səyyahlara vizaların verilməsini sadələşdirir, turizmin, ticarətin və biznesin inkişafına kömək edir və qeyri-müntəzəm miqrasiya axınlarının və Aİ-nin daxili təhlükəsizliyinə təhdidlərin qarşısını almaq üçün daha çox resurs cəlb edir”.
Viza qaydalarının dəyişdirilməsi qərarı Aİ Şurası tərəfindən ötən ilin iyununda qəbul edilib. Şuranın qərarında deyilir: “Yeni qaydalar leqal səyahətçilər üçün vizaların alınması prosedurlarını daha asan və sürətli edəcək. Qaydalar səfərdən 6 ay əvvəl və 15 gündən gec olmayaraq müraciət etməyə, müraciət formasını elektron şəkildə doldurmağa və imzalamağa, viza tarixi müsbət olan daimi səyyahlara müddəti tədricən artırılaraq bir ildən beş ilə çatdırılan təkrar vizaların verilməsinə imkan yaradır”.
Bundan əlavə, Aİ konsulluq rüsumunu artıraraq 60 avrodan 80 avroya çatdırıb. Qərarda deyilir: “Üzv dövlətlərin vizaların rəsmiləşdirilməsi xərclərini müraciət edənlərə maneə olmadan daha yaxşı təmin etmələri üçün viza rüsumunun məbləği artırılaraq 80 avroya çatdırılacaq. Reqlament viza haqqının dəyişdirilməsi zərurətini hər üç ildən bir nəzərdən keçirmək mexanizminin tətbiqini nəzərdə tutur”.
