Əqli Mülkiyyət Agentliyi FAKTLARI açıqladı
Pozulmuş müəlliflik hüquqlarının bərpası ilə bağlı 2019-cu ildə hüquqi və fiziki şəxslərdən Əqli Mülkiyyət Agentliyinə 10 müraciət daxil olub.
Rakus.az xəbər verir ki, bu barədə agentlik məlumat yayıb.
Bildirilib ki, həmin müraciətlərə müəllif-hüquq qanunvericiliyinin tələbləri nöqteyi-nəzərindən baxılıb, bir qismi agentliyin səlahiyyətləri çərçivəsində həll edilib, bir qismi isə aidiyyəti qurumlara göndərilib.
Bundan əlavə, Əqli Mülkiyyət Agentliyinin Sənaye mülkiyyətinin mühafizəsi sahəsində mübahisələrə baxan Apellyasiya Şurası tərəfindən 135 işə baxılıb (onlardan 110-u 2019-cu ildə daxil olan, 25-i isə əvvəlki dövrdən qalan işlərdir).
Belə ki, 52 iş üzrə ərizənin təmin edilməsi, 26 iş üzrə ərizənin qismən təmin edilməsi, 45 iş üzrə, o cümlədən əmtəə nişanına dair 43, ixtiraya dair 1, sənaye nümunəsinə dair 1 ərizənin rədd edilməsi haqqında qərarlar qəbul edilib. 12 ərizə baxılmamış saxlanıb (ərizə geri götürülüb).
Həmçinin bildirilib ki, ötən ildə əsərlərin qeydiyyatı ilə bağlı müəllif hüququna aid 834 və milli əmtəə nişanları üzrə 1 114 qeydiyyata alınması ilə Şəhadətnamələr verilib.
