“Ailə və cəmiyyət, ənənə və məsuliyyət” mövzusunda konfrans keçirildi - FOTO
Sentyabrın 27-də Yeni Azərbaycan Partiyasının (YAP) İcra Katibliyində “Ailə və cəmiyyət, ənənə və məsuliyyət” mövzusunda konfrans keçirilib.
Rakus.az xəbər verir ki, tədbirdə ölkədə fəaliyyət göstərən siyasi partiyaların və QHT-lərin qadın üzvləri iştirak ediblər.
Milli Məclisin deputatı, YAP Siyasi Şurasının üzvü, partiyanın Nəsimi rayon təşkilatının sədri Məlahət İbrahimqızı Azərbaycan qadınının hüquqlarının qorunması ilə bağlı qəbul edilən qanunvericilik bazasının gündən-günə təkmilləşdiyini söyləyib. Deputat qeyd edib ki, sosial şəbəkələrdə qadına qarşı zorakılıq halları ilə bağlı yayılan məlumatlar narahatlıq doğurub. Yeni Azərbaycan Partiyası hər zaman başqa siyasi qurumlara konstruktiv əməkdaşlıq etməklə bağlı çağırışlar edib. Lakin qadın məsələsi qlobal problem olduğuna görə buna biganə qala bilmərik. Ona görə də həmin məsələyə siyasi partiyanın daxili işi kimi baxmırıq. Qadına və qızlara qarşı təcavüz, şiddət bütün qadınları narahat edir. Qadınların hüquqlarının müdafiəsi üçün həmrəy olmalıyıq.
Azəri-Türk Qadınlar Cəmiyyətinin sədri Tənzilə Rüstəmxanlı deyib ki, qadına, qıza qarşı şiddət məsələsində ictimai qınaq olmalıdır. Xüsusilə də siyasi hakimiyyətə iddiası olan şəxslərin ailələrində belə halların baş verməsi cəmiyyət üçün təhlükəlidir. Ailədə əvvəlcədən düzgün tərbiyə üsulu olmalıdır ki, sonda da belə hadisələr baş verməsin. “Biz heç bir söyüş və təhqirdən qorxmadan sözümüzü deməyi bacarmalıyıq. Azərbaycanda heç vaxt qadın zorakılığına göz yumulmayıb və bundan sonra da belə olacaq”, – deyə o bildirib.
Daha sonra konfransda qadınların cəmiyyətdəki rolu barədə fikir mübadiləsi aparılıb.
